तासु बृहत्कं बृहतामेकम् ।
एतेन ह वा एतदहर्बार्हतं क्रियते ।
देवा वै स्वर्गकामास्तपोऽतप्यन्त ।
त एतत्सामापश्यन् ।
तेनास्तुवत ।
तदेनान्बृहदेव भूत्वा स्वर्गं लोकमवहत् ।
तेनाब्रुवन्स्वर्गं लोकं गत्वा बृहद्वाव न इदं कमभूद्येन स्वर्गं लोकं व्यापामेति ।
तदेव बृहत्कस्य बृहत्कत्वम् ।
तदेतत्स्वर्ग्यं साम ।
बृहदस्मै कं भवत्य् । अश्नुते स्वर्गं लोकं य एवं वेद ।
सोमः पुनान ऊर्मिणा अव्यं वारं वि धावति ।
अग्रे वाचः पवमानः कनिक्रदत्
इत्यग्रमिव भवति ।
अग्रं ह्येतदहर्यद्बार्हतम् ।
धीभिर्मृजन्ति वाजिनमिति मृजन्तीव वै जातम् ।
जायत उ एतेनाह्ना ।
असर्जि कलशं अभि मीढ्वान्सप्तिर्न वाजयुः ।
पुनानो वाचं जनयन्नसिष्यदत्
इति जनद्वतीर्भवन्ति ।
षोडशिनमेवैतत्तृतीयसवनात्प्रजनयन्ति ।
सवनात्सवनाद्ध वै षोडशिनं प्रजनयन्ति ७८