परि प्रिया दिवः कविर्
इत्यार्भवस्य पवमानस्य परिवतीर्गायत्र्यो भवन्त्यन्तस्य रूपम् ।
अन्तो वा अनुष्टुप्छन्दसाम् ।
आनुष्टुभमेतदहः ।
प्रप्र क्षयाय पन्यस
इति प्रायणीयरूपमेवैतदुपगच्छन्ति ।
प्रायणीयं ह्येतदहः ।
स सूनुर्मातरा शुचिर्जातो जाते अरोचयद्
इति जनद्वतीर्भवन्ति ।
षोडशिनमेवैतत्तृतीयसवनात्प्रजनयन्ति ।
तासु गायत्रमुक्तब्राह्मणम् ।
अथौर्णायवम् ।
ऊर्णायुर्वै गन्धर्वोऽप्सरसोऽकामयत ।
स एतत्सामापश्यत् ।
तेनास्तुत ।
तेन यां यामकामयत तामीयामिति यां यामेवाभ्यमृशत्तामुपैत्तामवारुन्द्ध ।
तदेतत्कामसनि साम ।
एतं वै स काममकामयत ।
सोऽस्मै कामस्समार्ध्यत ।
यत्काम एवैतेन साम्ना स्तुते । समस्मै स काम ऋध्यते ।
यदूर्णायुर्गन्धर्वोऽपश्यत्तस्मादौर्णायवमित्याख्यायते ७६