स ह तैरेवास्थिभिर्नव नवतीर्जघानासुराणाम् ।
तदेतद्भ्रातृव्यहा विजितिः ।
इन्द्रो दधीचो अस्थभिर्वृत्राण्यप्रतिष्कुतः ।
जघान नवतीर्नव
इति ।
विजयते हन्ति द्विषन्तं भ्रातृव्यं य एवं वेद ।
अत्राह गोरमन्वत नाम त्वष्टुरपीच्यम् ।
इत्था चन्द्र मसो गृहे
इति गोमतीः पशुमतीर्भवन्ति पशूनामेवावरुद्ध्यै ।
इयं वामस्य मन्मन
इत्यैन्द्रा ग्नं भवति ।
इन्द्रा ग्नी पूर्व्यस्तुतिः ।
अभ्राद्वृष्टिरिवाजनि
इति ।
अजनीति वा आहुर्जातम् ।
जायत उ एतेनाह्ना ।
शृणुतं जरितुर्हवमिन्द्रा ग्नी वनतं गिरः ।
ईशाना पिप्यतं धियः
मा पापत्वाय नो नरेन्द्रा ग्नी माभिशस्तये ।
मा नो रीरधतं निदे
इति पाप्मन एवैषोपहतिः ।
एकविंश स्तोमो भवति ।
द्वादश मासाः । पञ्चर्तवस् । त्रय इमे लोका । असावादित्य एकविंशः ।
एतस्य वा एते सलोकतां गच्छन्त्येतमभ्यारोहन्ति ६५