षडृचं भवति षड्वा ऋतव -ऋतूनामेवाप्त्यै ।
तदाहुर्यत्षडृचं षष्ठस्याह्नो रूपम् । अथ कस्माच्चतुर्थेऽहन्क्रियते इति ।
स ब्रूयात्षड्वा ऋतवस्सं वत्सरस् । संवत्सरः प्रजापतिर्यज्ञः ।
संवत्सरमेवैतेन प्रजापतिं यज्ञमाप्त्वा सवनमुखे पुनरारभन्ते ।
आप्यत इव ह्येतद्यज्ञो यदेष पूर्वस्त्र्यह आप्यत इति ।
उत्तरं षडृचं भवति ।
अभिपूर्वमेवैतेन यज्ञमारभन्ते ।
हिन्वन्ति सूरमुस्रय
इति हिन्वन्तीव वै जातम् ।
जायत उ एतेनाह्ना ।
स्वसारो जामयस्पतिमितीमा ह वाव स्वसारः ।
इमा उ एव जामयः ।
महामिन्दुं महीयुव
इतीमा ह वाव महीयुवः ।
ता एवैनमेतद्धिन्वन्ति ।
पवमान रुचारुचे
ति रुक्मत्सौर्यरूपमुपगच्छन्ति ।
सौर्यं ह्येतदहरेकविंशं प्रतिष्ठा वैराजम् ।
आ पवमान सुष्टुतिं वृष्टिं देवेभ्यो दुवः ।
इषे पवस्व संयतमिति पर्यासो भवति प्रजानां धृत्यै पशूनामुपस्थित्यै ।
एकविंश स्तोमो भवति ।
द्वादश मासाः । पञ्चर्तवस् । त्रय इमे लोका । असावादित्य एकविंशः ।
तास्संस्तुता द्वादश जगत्यो भवन्ति ।
ताश्चतुर्विंशतिर्गायत्र्यः ।
ता अष्टादशानुष्टुभः ।
आनुष्टुभमेतदहः ६१