तासु वाचस्साम ।
निष्कर्या देवास्सत्रमासते ।
ते स्वर्गं लोकं न प्रजानन्नेतत्तृतीयमहः ।
तेऽकामयन्त प्र स्वर्गं लोकं जानीयामेदं तृतीयमहरिति ।
तान्वाक्साम गायमानोपाप्लवत ।
तदपश्यन् ।
तेनास्तुवत ।
तेनार्ध्नुवन् ।
तेन स्वर्गं लोकं प्रजानन्नेतत्तृतीयमहः ।
तदेतदृद्धि स्वर्ग्यं साम ।
ऋध्नोति । गच्छति स्वर्गं लोकं य एवं वेद ।
यद्ध वै शिवं शान्तं वाचस्तत्साम ।
सामन्वदतीति वा आहुः ।
साधु वदन्तं तद्यदेतत्साम भवति शिवेनैवैतद्वाचश्शान्तेन त्र्यहं शमयन्ति ।
यदु वाक्साम गायमानोपाप्लवत तस्माद्वाचस्सामेत्याख्यायते ।
सखाय आ नि षीदत पुनानाय प्र गायते
ति प्रवतीः परिवतीर्भवन्ति ।
तद्यत्प्रवतीर्भवन्ति चतुर्थस्यैवाह्नः प्रजात्यै ।
अथ यत्परिवतीरन्तस्य रूपमन्तो ह्येतदहर्योऽन्तस्सोऽन्तोऽसदिति ।
परि परीति वा अन्तं पर्यन्ति ५२