यद्द्याव इन्द्र ते शतं शतं भूमीरुत स्युः ।
न त्वा वज्रिन्सहस्रं सूर्या अनु
इति यद्वै शतवत्सहस्रवत्तज्जगत्यै रूपम् ।
जागतमेतदहः ।
न जातमष्ट रोदसी
इतीमे ह वाव रोदसी ।
एते एवैतदभिवदति ।
आ पप्राथ महिना वृष्ण्या वृषन्विश्वा शविष्ठ शवसे
ति विश्ववतीर्भवन्ति ।
वैश्वदेवं ह्येतदहः ।
अस्मं अव मघवन्गोमति व्रजे वज्रिञ्चित्राभिरूतिभिर्
इति गोमतीः पशुमतीर्भवन्ति पशूनामेवावरुद्ध्यै ।
पशवो ह्येतदहः ।
तासु वैरूपम् ।
संवत्सरो वै विरूपो । विरूपा ऋतवो । विरूपा अर्धमासाः ।
तद्यत्पञ्चनिधनं पञ्च ह्यृतवो । यद्द्वादशनिधनं द्वादश हि मासा । यद्दिग्वदाक्रमणावत्तेन । यद्विश्ववद्वैश्वदेवं ह्येतदहः ।
प्रजननं वा एतद्वैरूपम् ।
तद्यत्तृतीयेऽहन्क्रियते चतुर्थस्याह्नः प्रजात्यै ।
यद्देवा अभवंस्तदसुरा अभवन् ।
ते देवा अश्वा अभवंस् । तदसुरा नान्ववायन् ।
ततो वै देवा अभवन् । परासुराः ।
भवत्यात्मना परास्य द्विषन्भ्रातृव्यो भवति य एवं वेद ४८