ता गोमतीरिळावतीरश्ववतीः पशुमतीर्भवन्ति पशूनामेवावरुद्ध्यै ।
पशवो ह्येतदहः ।
विश्ववतीर्भवन्ति ।
वैश्वदेवं ह्येतदहः ।
अन्तरिक्षवतीर्भवन्ति ।
अन्तरिक्षं ह्येतदहः ।
आशीर्वतीर्भवन्ति ।
आशीर्वद्ध्येतदहः ।
अथो आशिरं वै तृतीयसवनेऽवनयन्ति ।
तृतीयसवनभाजनमेतदहः ।
पञ्चर्चं भवति पञ्च वै दिशो दिशामेव धृत्यै ।
अथो पाङ्क्तो वै यज्ञो यज्ञस्यैवारम्भाय ।
पर्यासो भवति प्रजानां धृत्यै पशूनामुपस्थित्यै ।
सप्तदशस्तोमो भवति ।
प्रजापतिर्वै सप्तदशः ।
प्रजापतावेवैतत्प्रतितिष्ठन्तो यन्ति ३६