तासु सीदन्तीयम् ।
देवा वा अकामयन्त स्वर्गे लोके सीदेमेति ।
त एतत्सामापश्यन् ।
तेनास्तुवत ।
ततो वै ते स्वर्गे लोकेऽसीदन् ।
स्वर्गे लोके सीदामेति सत्रमासते ।
स्वर्ग एव लोके सीदन्ति ।
यदु देवा एतेन साम्ना स्वर्गे लोकेऽसीदंस्तस्मात्सीदन्तीयमित्याख्यायते ।
तद्वेवाचक्षते शङ्क्विति ।
शङ्कुना वै तद्दृंहन्ति यद्दधिषेण्यं भवति ।
दधिषेण्यमिवैतदहर्यद्द्वितीयम् ।
तस्माद्द्वितीयेऽहन्क्रियते ।
इन्द्र मच्छ सुता इमे वृषणं यन्तु हरयः ।
श्रुष्टे जातास इन्दव स्वर्विदः ।
इत्यृचा वै पूर्वमह स्वर्वत्क्रियते । साम्नैतत् ।
राथन्तरं हि पूर्वमहर् । बार्हतमेतत् ३०