प्रोक्तिश्च ह खलु वा एते सामनी हविषो निरुक्तिश्च ।
तद्यद्धाविष्मतं द्वितीयेऽहनि भवति । हविष्मन्त स्म इत्येवैतद्देवेभ्यः प्राहुः ।
हविष्मन्त इव ह्येतर्हि भवन्ति ।
अथ यद्धाविष्कृतं नवमेऽहनि भवति । हविष्कृत स्म इत्येवैतद्देवेभ्यो निराहुः ।
हविष्कृत इव हि तर्हि भवन्ति ।
ते ह वा एते सामनी प्रोक्तिश्चैव हविषो निरुक्तिश्च ।
यदु हविष्मांश्च हविष्कृच्चाङ्गिरसावपश्यतां तस्माद्धाविष्मत-हाविष्कृते इत्याख्यायेते ।
पवस्व मधुमत्तम
इति मधुमतीः ककुभो भवन्ति ।
रसो वै मदः ।
धीतमिवैतद्यत्तृतीयसवनम् ।
तद्यदेता मधुमतीर्भवन्ति रसमेवास्मिन्नेतद्दधत्यैवैनदेतेन प्याययन्ति ।
इन्द्रा य सोम ऋतुवित्तमो मदः ।
महि द्युक्षतमो मदः ।
इत्यभिपूर्वमेवास्मिंस्तद्र सं मदं दधति २९