अविदमिति होवाचेमा रसायामन्तर्वलेनापिहिताः ।
ता यथा मन्यध्वमेवमाजिहीर्षतेति ।
तां ह तदिन्द्र उवाचान्नादीमरे ते सरमे प्रजां करोमि या नो गा अन्वविद इति ।
ते हैते विदर्भेषु माचलास्सारमेयाः ।
अपि ह शार्दूलं मारयन्ति ।
ते देवा एतमभिप्लवं समभरन् ।
तेनैना अह्ब्यप्लवन्त ।
यदभ्यप्लवन्त तदभिप्लवस्याभिप्लवत्वम् ।
तेऽग्निनैव वलमभ्यौषन्वज्रेणाभिन्दन् ।
स य एष पुरस्ताज्ज्योतिस्सोऽग्निरथ यत्पञ्चदशं गोर्बहिष्पवमानं स वज्रः ।
ता आयुषैवायुवत ।
यदायुषैवायुवत तदायुष आयुष्ट्वम् ।
ता एतेनैव ज्योतिषोभयतः पर्यौहन् ।
त एते चत्वारो मध्य उक्थ्या भवन्ति ।
पशवो वा उक्थानि ।
तेषां सहस्रं स्तोत्र्याः ।
ब्रह्म वै ज्योतिरग्निष्टोमः ।
ता एतेनैव ब्रह्मणा ज्योतिषोभयतः परिगृह्योदाहरन् ।
ते य एवं विद्वांसोऽभिप्लवमुपयन्ति सहस्रसनयो हैवोत्थिता भवन्ति ।
तदाहुर्यदेष चतुरहो मध्ये व्यतिषक्तो गौरायुर्गौरायुरित्यथ कस्माज्ज्योतिषी विपर्यूढे इति ।
मिथुनत्वाय प्रजननायेति ह ब्रूयात् ।
प्र मिथुनेन जायते य एवं वेद ४४२