ते सतिसदो ह वा अन्ये सत्रसदोऽन्ये ।
सत्येवान्ये सीदन्ति सत्रमन्य आसते ।
ते हैव सतिसदो य एवं विद्वांसो दीक्षन्ते ।
एतासु हि देवतासु सति सीदन्तो यन्ति ।
ते ह ते सर्वं पाप्मानमपघ्नते ।
अथ य एते शिखाच्छिन्नाः प्रसर्पमिच्छमाना आवेष्टन्ते ते हैव सत्रसदः ।
य एवं विद्वांसमुपवदति यथैता देवता ऋत्वानीयादेवं नेत्येतासु ह्येवैनं देवतासु प्रपन्नमेतासु वसन्तमुपवदति तस्य हैतस्य नैव का चनार्तिरस्ति य एवं वेद ।
य एवैनमुपवदति स आर्तिमार्च्छति ।
तानि वा एतानि संवत्सरस्य दशैवाहान्यतिरात्रावारम्भणीयमहाव्रतीये अहनी पृष्ठ्याभिप्लवौ विश्वजिदभिजितौ स्वरसामानश्च विषुवांश्च ।
प्रवतिर्ह कौशान्तेयः कुसुर्बिन्दस्यौद्दालकेर्ब्रह्मचार्यास ।
तं होवाच सोम्य सूतपुत्र कति ते पिता संवत्सरस्याहान्यमन्यतेति ।
दशेति होवाच ।
दश वावेति होवाच दशाक्षरा विराडन्नं विराड्वैराजो यज्ञः ।
कत्येवामन्यतेति ।
नवेति होवाच ।
नव वावेति होवाच ।
नव वै पुरुषे प्राणाः ।
प्राणैरु यज्ञस्तायते ।
कत्येवामन्यतेति ।
आष्टाविति होवाच ।
अष्टौ वावेति होवाच ।
अष्टाक्षरा गायत्री ।
गायत्रो यज्ञः ।
कत्येवामन्यतेति ।
सप्तेति होवाच ।
सप्त वावेति होवाच ।
सप्त वै छन्दांसि छन्दोभिर्यज्ञस्तायते ।
कत्येवामन्यतेति ।
षडिति होवाच ।
षड्वावेति होवाच ।
षड्वा ऋतवस्संवत्सरः ।
संवत्सरो यज्ञः ।
कत्येवामन्यतेति ।
पञ्चेति होवाच ।
पञ्च वावेति होवाच ।
पाङ्क्तो यज्ञः ।
पाङ्क्ताः पशवः ।
पशवो यज्ञः ।
कत्येवामन्यतेति ।
चत्वारीति होवाच ।
चत्वारि वावेति होवाच ।
चतस्रो दिशश्चतुष्पदाः पशवश्चत्वारि छन्दांसि यज्ञवाहो गायत्री त्रिष्टुब्जगत्यनुष्टुप् ।
कत्येवामन्यतेति ।
त्रीणीति होवाच ।
त्रीणि वावेति होवाच ।
त्रिषवणो यज्ञस्त्रयः प्राणापानव्यानास्त्रय इमे लोकाः ।
कत्येवामन्यतेति ।
द्वे इति होवाच ।
द्वे वावेति होवाच ।
अहोरात्रावेवेति ।
द्वाविमौ लोकावाविष्टमाविव द्वौ प्राणापानौ द्विपात्पुरुषः ।
कत्येवामन्यतेति ।
एकमिति होवाच ।
एकं वावेति होवाच ।
अहरेवेति ।
तदिदमहरभूदह श्वो भविता ।
तदेतदहरहरित्येव प्रोच्यते ।
सा हैषा संवत्सरस्य प्रतिष्ठा यदहः ।
स यो हास्यतां प्रतिष्ठां वेद प्रतितिष्ठति ।
एषो एवास्यैकता ।
स यो हास्यैतामेकतां वेदैकधा हैनं भूत्वा श्रीस्सचते ।
तदाहुर्भूतं भूया३भविष्या३दिति ।
भूतमेव भूयो भविष्यत इति ब्रूयात् ।
भूता इमे लोका भूतोऽयमग्निर्वायुरसावादित्य इन्द्र श्चन्द्र माः ।
एते वै भूतस्य भविष्यतश्चेशते ।
तस्माद्भूतमेव भूयो भविष्यत इति ४३१