तदाहुस्तवश्शाव्यमेवैतस्याह्नः पृष्ठं कार्यमिति ।
देवा वै यदग्रे व्रतं समभरंस्तत्तवश्शाव्यमभवत् ।
तद्यदेतस्याह्नस्तवश्शाव्यं पृष्ठं भवति व्रतमेवैतत्प्रत्यक्षमुपयन्ति ।
तदु वा आहुर्दुष्प्रज्ञाना वै तवश्शाव्यस्य स्तोभाः पदवृत्तीः प्रस्तावाः प्रतिहारा देवता निधनानि ।
वामदेव्यमेवैतस्याह्नः पृष्ठं कार्यमिति ।
आत्मा वै व्रतस्य वामदेव्यम् ।
स यथागत्य गृहान्न विन्देत्तादृक्तद्यदेतस्याह्नोऽन्यद्वामदेव्यात्पृष्ठं कुर्युः ।
तदाहु स्वारं न पृष्ठतायै ।
तत्स्थानं राजनमेवैतस्याह्नः पृष्ठं कार्यमिति ।
राजनेन वै प्रजाअतिः प्रजानां राज्यमैश्वर्यमाधिपत्यमगच्छत् ।
तद्येन प्रजापतिः प्रजानां राज्यमैश्वर्यमाधिपत्यमगच्छत्तेन प्रजानां राज्यमैश्वर्यमाधिपत्यं गच्छामेति ।
परोक्षमिव ह खलु वा एतद्वामदेव्यं यद्रा जनम् ।
राजनं पृष्ठं भवति ।
वामदेव्यं मैत्रावरुणसाम ।
पञ्चनिधनं वामदेव्यं ब्रह्मसाम ।
सामाभिपूर्वमेवैतद्वामदेव्येन मध्यत आत्मानं सन्दधतो यन्ति ४११