३९७

अथ ह स्माह सिरिन्दः पालालिरमावास्यायामेवोत्सृज्यमिति ।

अमावास्यायां वा एतद्देवता उदसृजन्त ।

देवतानामुत्सृष्टिमनूत्सृजामहा इति ।

एते उ ह वै संवत्सरस्य मेध्ये रात्री यत्पौर्णमासी चामावास्या च ।

तद्यत्पौर्णमासीं चामावास्यां चोत्सृजेरन्संवत्सरं मेधेनव्यर्धयेयुः ।

त्रिवृदेवाग्निष्टोमः कार्य इति ।

तस्य यन्न्यूनानि स्तोत्राणि भवन्ति तेनैवोत्सृष्टं च न चेति ।

अथ ह स्माह नगरी जानश्रुतेय एकत्रिक एवोपेत्य इति ।

तस्य यच्छ्वाङ्क्षितानीव स्तोत्राणि भवन्ति तेनैवोत्सृष्टं च न चेति ।

अथ ह स्माहारुणिर्यावेवैतौ गोआयुषी स्तोमौ ताभ्यामेवोत्सृष्टं च न चेति ।

तयोर्यस्य न्यूनानि स्तोत्राणि तेनोत्सृष्टं यस्यातिरिक्तानि तेनानुत्सृष्टम् ।

तस्मादेतावेवोपेत्याविति ३९७