उत्सृज्या३ं नोत्सृज्या३मिति मीमांसन्ते ।
तदाहुरुत्सृज्यमेवेति ।
यो वा अविमोकं यात्युद्वा वै स कृन्तति प्र वा क्षिणोति ।
अविमोकमिवैते यन्ति ये नोत्सृजन्ते ।
तद्यत्पौर्णमासीरुत्सृजन्तेऽरिष्ट्या एव ।
यो वै पूर्ण आवपति वि वा वै तत्पतति प्र वा शीर्यते ।
पूर्ण एष यत्संवत्सरः ।
तद्यत्पौर्णमासीरुत्सृजन्तेऽरिष्ट्या एव ।
ऊनाद्वै रेतस्सिच्यत ऊनात्प्रजाः प्रजायन्ते ।
पूर्ण एष यत्संवत्सरः ।
तद्यत्पौर्णमासीरुत्सृजन्ते रेतस एव तल्लोकं कुर्वन्ति प्रजननाय ।
ऊनाद्वै प्राणा ईरते ।
प्रजापतिरेष यत्संवत्सरः ।
तस्यैते प्राणा यत्पौर्णमास्यः ।
तद्यत्पौर्णमासीरुत्सृजन्ते प्रजापतेरेव तत्प्राणानुत्सृजन्ते ।
पौर्णमासीस्तोमा ह खलु वै देवाः ।
तद्यत्पौर्णमासीरुत्सृजन्ते को देवान्प्रत्यभिष्टोतुमर्हतीति ३९३