३८२

तदाहुरयातयामानीव वा एतच्छन्दांसि युञ्जति यदेनानि यातयामानि सन्ति ।

तानि सर्वाणि पुनः पुनः प्रयुञ्जते ।

यानेव वीर्यवत्तमान्प्रगाथान्मन्येरंस्तान्प्रणिश्चित्य षट्त्रिंशदुपेयुरिति ।

षट्त्रिंशदक्षरा वै बृहती ।

बृहती स्वर्गो लोकस्साम्राज्यम् ।

बृहत्यामेव तत्स्वर्गे लोके साम्राज्ये प्रतितिष्ठन्तो यन्ति ।

षडुत्सर्गं त्रिंशता पुनरभ्यावर्तमयातयामतायै ।

अथो आहुस्त्रयस्त्रिंशदेवोपेत्या इति ।

त्रयस्त्रिंशद्वै सर्वा देवताः ।

सर्वास्वेवैतद्देवतासु प्रतितिष्ठन्तो यन्ति ।

त्रीनुत्सर्गं त्रिंशता पुनरभ्यावर्तमयातयामतायै ।

अथो आहुस्त्रिंशदेवोपेत्या इति ।

त्रिंशदक्षरा विराडन्नं विराट् ।

विराज्येव तदन्नाद्ये प्रतितिष्ठन्तो यन्ति ।

अथो आहुश्चतुर्विंशतिरेवोपेत्या इति ।

चतुर्विंशत्यर्धमासो वै संवत्सरः ।

अर्धमासश एव तत्संवत्सरे प्रतितिष्ठन्तो यन्ति ।

अथो आहुर्द्वादशैवोपेत्या इति ।

द्वादश मासास्संवत्सरः ।

मासश एव तत्संवत्सरे प्रतितिष्ठन्तो यन्ति ।

अथो आहुष्षडेवोपेत्या इति ।

षड्वा ऋतवः ।

ऋतुष्वेव तत्प्रतितिष्ठन्तो यन्ति ।

अथो आहुश्चत्वार एवोपेत्या इति ।

चतस्रो दिशश्चतुष्पदाः पशवः ।

दिक्षु चैतत्पशुषु च प्रतितिष्ठन्तो यन्ति ।

अथो आहुस्त्रय एवोपेत्या इति ।

त्रयो वा इमे लोकाः ।

एष्वेव तल्लोकेषु प्रतितिष्ठन्तो यन्ति ।

अथो आहुर्द्वावेवोपेत्याविति श्यैतनौधसयोरेव प्रगाथाविति ।

श्यैतनौधसयोर्ह खलु वै प्रगाथौ वीर्यवत्तमौ ।

द्विपाद्यजमानः प्रतिष्ठित्यै ३८२