स इन्द्र एतामष्टकामपश्यत् ।
तस्यामदीक्षत ।
स एकयाश्नुत ।
यदेकयाश्नुत तदेकाष्टकाया एकाष्टकात्वम् ।
ते य एवं विद्वांसो दीक्षन्ते सर्व एवाश्नुवते सर्वे विषुवन्तो भवन्ति ।
विषुवान्ह्येषोऽभवत् ।
ते यत्पुरस्ताद्दीक्षेरन्पितृलोके दीक्षेरन्प्रमायुकाः स्युर् ।
यदुपरिष्टाद्दीक्षेरन्यथा पूर्वं पलायितुमीप्सेत्तं वाप्नुयात्तं वा न तादृक्तत् ।
त एतस्यामेवाष्टकायां दीक्षेरन् ।
तद्यथा रथमुपस्थितमातिष्ठेद्धस्तिनं वा निषादितं तथा ।
कद्रि यञ्चस्सत्रिण इति वै पृच्छन्ति ।
नार्वाञ्चो न पराञ्च इति ब्रूयाद्यथासावादित्य इति ।
न ह वा एतेऽर्वाञ्चो न पराञ्चः ।
तिर्यञ्चो ह वा एते ।
नो ह वा असावादित्योऽर्वाङ्न पराङ्तिर्यङु ह वा एष ।
षड्वा एष मासो दक्षिणैति षडुदङ् ।
यान्दक्षिणैति ते पितृदेवत्या यानुदङ्ते देवदेवत्याः ३७२