तद्वैराजपृष्ठं भवत्यन्नं वै वैराजमन्नाद्यस्यैवावरुद्ध्यै ।
तदुक्थ्यं भवति पशवो वा उक्थान्यन्नं पशवोऽभिपूर्वस्यैवान्नाद्यस्यावरुद्ध्यै ।
तत्षोडशिमद्भवति वज्रो वै षोडश्यन्नं विराड्वज्रेणैवान्नाद्यं परिगृह्णन्ति ।
तदेकविंशं भवति द्वादश मासाः पञ्चर्तवस्त्रय इमे लोका असावादित्य एकविंशः ।
एतद्वै दैव्यं क्षत्रम् ।
क्षत्रिय उ वा अन्नाद्यस्य प्रदाता ।
स योऽन्नाद्यस्य प्रदाता स नोऽन्नाद्यं प्रयच्छादिति ।
अथैते चत्वारस्त्रियहा भवन्ति द्वादशाहानि ।
द्वादश वै संवत्सरस्य पौर्णमास्यः ।
पौर्णमासीनामेवैषा सम्मा पौर्णमासीनामृद्धिः ।
अथैष पृष्ठ्यष्षडहो भवति ।
श्रीर्वै पृष्ठानि वर्ष्म वै पृष्ठानि ।
तच्छ्रियं वर्ष्म पृष्ठानि रोहन्ति ।
तदु सत्रिणो भवन्ति ।
अथैते चत्वार उत्तरे त्र्यहा भवन्ति द्वादशो एवाहानि ।
द्वादश वै संवत्सरस्यामावास्याः ।
अमावास्यानामेवैषा सम्मामावास्यानामृद्धिः ।
द्वादशैतानि परस्तात्पृष्ठ्यस्य षडहस्याहानि भवन्ति द्वादशावस्तात् ।
तस्मात्समावतीस्संवत्सरस्य पौर्णमास्यश्चामावास्याश्च ।
वैश्वनर उदयनीयोऽतिरात्रो भवति ।
वैश्वानरोदयना ह्यहीनास्सोमाः ३६४