३५६

अथैते पञ्चाहा भवन्ति पञ्च वै जयाः ।

पञ्चभिर्वै व्याहृतिभिरिदं देवा अजयंस्तद्यावतेदं देवा अजयंस्तावता जयामेति ।

पाङ्क्तो यज्ञः ।

यावती यज्ञस्य मात्रा तामाप्नवामेति ।

पाङ्क्ताः पशवः ।

यावती पशूनां मात्रा तावता नः पशवोऽवरुद्धा उपतिष्ठान्ता इति ।

पाङ्क्तमन्नाद्यं यावत्यन्नाद्यस्य मात्रा तावता नोऽन्नाद्यमवरुद्धमुपतिष्ठाता इति ।

अथ स्माहुः कापेया अनृतौ वा एष प्रतिष्ठितो यत्षडहः ।

पञ्चाहो वा ऋतौ प्रतिष्ठित इति ।

वसन्तो वै प्रथम ऋतूनां ग्रीष्मो द्वितीयो वर्षास्तृतीयाश्शरच्चतुर्थी हेमन्तः पञ्चमश्शिशिरष्षष्ठः ।

स एष श्रेष्ठ ऋतूनां यद्धेमन्तः पीवगुः पीववत्सः ।

तमनु पञ्चाहः प्रतितिष्ठन्नेति ।

अथैष परिचक्ष्यैव यच्छिशिरः कृशगुः कृशपुरुषः ।

तमनु षडहः प्रतितिष्ठति ।

स य श्रेष्ठ ऋतूनां हेमन्तस्तस्य प्रतिष्ठामनु प्रतितिष्ठन्तोऽयामेति ।

तस्मादेतत्पञ्चाहविधमुपयन्ति ।

वैश्वानरः प्रायणीयोऽतिरात्रो भवति ।

वैश्वानरप्रायणा ह्यहीनास्सोमाः ३५६