\तस्य त्रिवृदग्निष्टोमः पुरस्ताद्भवति त्रिवृदग्निष्टोम उपरिष्टादष्टावुक्थ्याः सप्तदशा मध्ये ।
अन्नाद्यकामो हैतेन यजेत ।
अग्निर्वै पूर्वस्त्रिवृदादित्य उत्तरः ।
अग्निर्वा अस्य लोकस्याभ्रिरादित्योऽमुष्य ।
अथैतदन्नमेव यजेत ।
अष्टावुक्थ्यास्सप्तदशा मध्ये ।
अयमेवास्मा अग्निरित एतदन्नाद्यं रदत्यादित्योऽमुतो वृष्टिं प्रयच्छति ।
ता अस्मा एतदुभयतोऽन्नाद्यं रदतोऽन्नादो ह भवति य एवं वेद ।
अथो आहुः पशुकाम एवैनेन यजेतेति ।
तस्याग्निष्टोमावभितो भवत उक्थ्या मध्ये ।
ब्रह्म वा अग्निष्टोमः पशव उक्थानि ।
ब्रह्मणैव तदुभयतः पशून्परिगृह्णीतेऽपरावापाय ।
नास्य वित्तं परोप्यते य एवं वेद ।
अथ यस्यैतस्योर्ध्वष्षडह ऊर्ध्वस्त्र्यहो ज्योतिरतिरात्र स्वर्गकामो हैतेन यजेत ।
ऊर्ध्वा एते स्तोमा भवन्त्यूर्ध्वो वै स्वर्गो लोक स्वर्गस्यैव लोकस्य समष्ट्यै ।
अथ यस्यैतस्य ज्योतिर्गौरायुरतिरात्रो ज्योतिर्गौरायुरतिरात्रो ज्योतिरतिरात्रो यः कामयेत ज्योतिष्मतो लोकाञ्जयेयमिति स एतेन यजेत ।
चत्वार्यु ह वै देवानामाविष्टमानीव ज्योतींष्यग्निः पृथिव्यामादित्यो दिवि चन्द्र मा नक्षत्रेषु विद्युदप्सु ।
एतानेव ज्योतिष्मतो लोकाञ्जयति य एवं विद्वानेतेन यज्ञक्रतुना यजते य उ चैनमेवं वेद य उ चैनमेवं वेद ३३३