अथैष विवधः ।
तस्य ज्योतिरग्निष्टोमो गौरुक्थ्य आयुरुक्थ्यो ज्योतिरग्निष्टोम आयुरतिरात्रो ज्योतिरग्निष्टोमो गौरुक्थ्य आयुरुक्थ्यो ज्योतिरग्निष्टोमः ।
पशुकामो हैतेन यजेत ।
तस्यैषोऽन्यतस्सङ्गो गोआयुषी उक्थ्यावन्तरौ भवतः ।
पशवो वा उक्थानि ।
तयोः पञ्च शतानि स्तोत्र्याः ।
ज्योतिषी अग्निष्टोमावभितो भवतः ।
ब्रह्म वै ज्योतिरग्निष्टोमः ।
ब्रह्मणैव तदुभयतः पशून्परिगृह्णीतेऽपरावापाय ।
नास्य वित्तं परोप्यते य एवं वेद ।
आयुरतिरात्रो मध्ये भवति ।
तद्यथा ह वै विवधस्तस्य मध्ये पृथ्विवानवमर्दाय तादृक्तद् ।
तस्यैषोऽन्यतस्सङ्गो गोआयुषी उक्थ्यावन्तरौ भवतः ।
पशवो वा उक्थानि ।
तयोः पञ्च शतानि स्तोत्रियाः ।
ज्योतिषी अग्निष्टोमावभितो भवतः ।
ब्रह्म वै ज्योतिरग्निष्टोमः ।
ब्रह्मणैव तदुभयतः पशून्परिगृह्णीतेऽपरावापाय ।
नास्य वित्तं परोप्यते य एवं वेद ३२१