तेऽहर्भाज आसन् ।
ततो वै तेषामह्नैवैक आर्ध्नोदह्नैकोऽह्नैकः ।
सा ह खलु वै श्रेष्ठर्द्धीनां स लोकानां पुण्यतमो यमेतेन सप्तर्षय आर्ध्नुवन् ।
सा या श्रेष्ठर्द्धीनां यो लोकानां पुण्यतमो यमेतेन सप्तर्षय आर्ध्नुवंस्तमृध्नवानीति ।
तस्मात्सप्तरात्रेण यजते ।
सप्तैतान्यहानि भवन्ति सप्त स्तोमाः ।
अहरेव स्तोमो वहत्यह स्तोमोऽह स्तोमः ।
सा ह खलु वा अह्नां समृद्धिर्यदेनानि नाना स्तोमा वहन्ति ।
सा यैवाह्नां समृद्धिस्सैवैषा क्रियते ।
त उ सर्वे सप्त सम्पद्यैकविंशमेवाभिसम्पद्यन्ते त्रिवृच्च त्रयस्त्रिंशश्च तौ द्वावेकविंशौ पञ्चदशश्च त्रिणवश्च तौ द्वावेकविंशौ सप्तदशश्च पञ्चविंशश्च तौ द्वावेकविंशावेकविंश एवैकविंशः ।
द्वादश मासाः पञ्चर्तवस्त्रय इमे लोका असावादित्य एकविंशः ।
एतस्य वा एते सलोकतां गच्छन्ति ये सप्तरात्रयाजिनः ।
एतमभिसम्पन्न एषां लोक ऋध्नोति ।
एतं गच्छत्येतस्य सलोकतां य एवं वेद ३०२