अथैते षड्रात्राः ।
मरुतो वा अकामयन्तौजिष्ठा बलिष्ठा भूयिष्ठा वीर्यवत्तमा देवानां स्याम जयेम स्वर्गं लोकमिति ।
त एतं षड्रात्रं यज्ञमपश्यन् ।
तमाहरन् ।
तेनायजन्त ।
ततो वै त ओजिष्ठा बलिष्ठा भूयिष्ठा वीर्यवत्तमा देवानामासन्नजयन्स्वर्गं लोकम् ।
ओजिष्ठो बलिष्ठो भूयिष्ठो वीर्यवत्तम स्वानां भवति जयति स्वर्गं लोकं य एवं वेद ।
पृष्ठ्येन षडहेन यन्ति ।
श्रीर्वै वर्ष्म पृष्ठानि ।
श्रियमेव तद्वर्ष्म पृष्ठान्यभ्यारोहति ।
ओजो वै वीर्यं पृष्ठानि ।
ओजसैव तद्वीर्येण यन्ति ।
स्वर्गो वै लोकः पृष्ठानि ।
स्वर्गमेव तल्लोकं रोहन्तो यन्ति ।
तेषां सरस्वत्या उपमज्जने दीक्षा ।
दक्षिणे तीरे दीक्षन्ते २९७