अथ यस्यैतस्य ज्योतिषी अग्निष्टोमावभितो भवतो गोआयुषी उक्थ्यावन्तरौ ज्योतिरतिरात्रो मध्ये प्रजननकामो हैतेन यजेत ।
एतद्वै कृत्स्नम्प्रजननं यज्ज्योतिरतिरात्रः ।
मध्यत उ वा आत्मनः प्रजननम् ।
तद्यन्मध्ये ज्योतिरतिरात्रो भवति मध्यत एवैतदात्मनः प्रजननं धत्ते बहुर्भवति प्रजायते ।
गोआयुषी उक्थ्यावन्तरौ भवतः ।
पशवो वा उक्थानि ।
तयोः पञ्चशतानि स्तोत्रियाः ।
पशुभिरेव तदुभयतः प्रजां परिगृह्णीते ।
ज्योतिषी अग्निष्टोमावभितो भवतः ।
ब्रह्म वै ज्योतिरग्निष्टोमः ।
ब्रह्मणैव तदुभयतः प्रजां पशून्परिगृह्णीतेऽपरावापाय ।
नास्य वित्तं परोप्यते य एवं वेद ।
अथ यस्यैतस्य ज्योतिषी अग्निष्टोमावभितो भवतो गोआयुषी उक्थ्यावन्तरौ ज्योतिरग्निष्टोमो मध्ये यः कामयेता मे ब्रह्मवर्चसी प्रजायां जायेतेति स एतेन यजेत ।
तेजो वै ब्रह्मवर्चसं ज्योतिरग्निष्टोमः ।
मध्यत उ वा आत्मनः प्रजननम् ।
तद्यन्मध्ये ज्योतिरग्निष्टोमो भवति मध्यत एवैतदात्मनो ज्योतिर्धत्त आ हास्य ब्रह्मवर्चसी प्रजायां जायते ।
गोआयुषी उक्थ्यावन्तरौ भवतः ।
पशवो वा उक्थानि ।
तयोः पञ्चशतानि स्तोत्रियाः ।
पशुभिरेव तदुभयतो ब्रह्मवर्चसिनीं प्रजां परिगृह्णीते ।
ज्योतिषी अतिरात्रावभितो भवतः ।
इमौ वै लोकावतिरात्रौ ।
आभ्यामेवैतल्लोकाभ्यामुभयतः प्रजां पशून्परिगृह्णीतेऽपरावापाय ।
नास्य वित्तं परोप्यते य एवं वेद २९६