जितिर्वा एता व्याहृतयः ।
जितिः पञ्चरात्रः ।
जयति जयति य एवं वेद ।
सा वा एषा सर्वस्यान्या जितिस्सर्वस्यान्या पराजितिः ।
सर्वं वा एतेन देवा असुरानजयन् ।
सर्वमसुराः पराजयन्त ।
सर्वमेव द्विषन्तं भ्रातृव्यं जयति सर्वमस्य द्विषन्भ्रातृव्यः पराजयते य एवं वेद ।
अथैते सन्तता भवन्ति ।
यथा ह वै दारूणि वर्ध्रेण सन्ततानि रथस्य वानसो वैवं स्तोमैः पञ्चरात्रस्सन्ततः ।
प्राणा ह खलु वै स्तोमाः ।
प्राणैः पुरुषस्सन्ततः ।
सं ह तायते य एवं वेद ।
तस्य द्वौ-द्वौ स्तोमौ युक्तावहर्वहतः ।
द्वौ-द्वौ वै युक्तानां वहिष्ठौ ।
युक्तेन तत्र गच्छति यत्र जिगमिषति २९३