अथैष जामदग्न्यः ।
प्रजननकामो हैतेन यजेत ।
जमदग्निर्वा अकामयत बहुः प्रजया पशुभिः प्रजायेयेति ।
स एतं चतूरात्रं यज्ञमपश्यत् ।
तमाहरत् ।
तेनायजत ।
ततो वै स बहुः प्रजया पशुभिः प्राजायत ।
अपि हास्य द्वावौर्वौ प्रजायां न सञ्जज्ञाते कयस्त्वमसि कयस्त्वमसीति ।
तथा बहुरिह प्रजज्ञे ।
तस्मादिदमप्येतर्हि द्वावौर्वौ पलितौ समागत्य न सञ्जानाते ।
बहुः प्रजया पशुभिः प्रजायते य एवं वेद ।
तस्याहुस्संवत्सरं एव दीक्षा स्युरिति ।
प्रजननं वै संवत्सरः ।
प्रजननमेष यज्ञः ।
तत्तत्प्रजननं क्रियते ।
तस्मादु हैनेन प्रजननकामो यजेत ।
अथो आहुरष्टाचत्वारिंशदेव स्युरिति ।
अष्टाचत्वारिंशदक्षरा वै जगती ।
पशवो जगती ।
जागत एष यज्ञः ।
तस्मादु हैनेन पशुकामो यजेत ।
अथो आहुष्षट्त्रिंशदेव स्युः ।
षट्त्रिंशदक्षरा वै बृहती ।
बृहती वै स्वर्गं लोकमानशे ।
तद्वा अस्य स्वर्ग्यम् ।
तस्मादु हैनेन स्वर्गकामो यजेत ।
तानि त्रीणि जागतानि ।
त्रीणि जागतानि पदानि भवन्ति ।
तेन जगत्यै रूपान्न यन्ति ।
अथो आहुश्चतुर्विंशतिरेव स्युरिति ।
चतुर्विंशत्यर्धमासस्संवत्सरः प्रजननम् ।
प्रजननमेष यज्ञः ।
तत्तत्प्रजननं क्रियते ।
तस्मादु हैनेन प्रजननकामो यजेत ।
तदेकं जागतं पदं भवति ।
तेनैव जगत्यै रूपान्न यन्ति २८५