अयुजश्च उत्तरे स्तोमा भवन्ति ।
ऋतवो वा अयुजः ।
ऋतवो वा इदं सर्वं प्रजनयन्ति ।
ते य इदं सर्वं प्रजनयन्ति ते मा प्रजनयानिति ।
अह्नोऽह्न स्तोममुत्सृजमाना यन्ति ।
अह्नोऽह्न स्तोममभ्युपाहरन्ते ।
वीरो वा एष यत्स्तोमः ।
अह्नोऽह्न एव तद्वीर्यं प्रजनयन्तो यन्त्यह्नोऽह्नो वीर्यमभ्युपाहरन्तेऽक्षरेणाक्षरेणोत्क्रामन्तो यन्ति ।
एकाक्षरणिधनं प्रथमेऽहनि भवति द्व्यक्षरणिधनं द्वितीये त्र्यक्षरणिधनं तृतीये चतुरक्षरणिधनं चतुर्थेऽक्षरेष्ठा वीरोऽसदक्षरेष्ठा वीरोऽसदिति ।
नानाग्निष्टोमसामानि भवन्ति वीराणामेव नानावीर्यतायै ।
न ह वै स वीरो योऽन्यस्य वीर्यमनु वीरः ।
स ह वाव वीरो य आत्मन एव वीर्यमनु वीरः ।
तद्यन्नानाग्निष्टोमसामानि भवन्ति वीराणामेव नानावीर्यतायै २८२