ता अस्य प्रजास्सृष्टा वरुणस्य यवमादन् ।
ता वरुणो वरुणपाशेनागृह्णात् ।
स षक्षत या अमूः पूर्वाः प्रजा असृक्षि परा ता अभूवन् ।
यदीमाः पराभवन्ति क्व ततो भवानि हैन्तैना अभितो भिषज्यानीति ।
स एतौ द्विदिवौ वरुणप्रघासावपश्यत् ।
तावाहरत् ।
ताभ्यामयजत ।
ताभ्यामेना वरुणीयादेनसो व्यमुञ्चत् ।
तद्यदेतौ द्विदिवौ वरुणप्रघासौ भवतो वरुणीयादेवैताभ्यामेनसः प्रजा मुञ्चति ।
मरुत्वती पूर्वस्याह्न प्रतिपद्भवति ।
आग्नेयश्च मारुतश्च पशू ।
ता अस्य प्रजा वरुणगृहीता मरुतो रन्ध्राण्यन्ववपातिनो व्यमिमथिषन्त ।
तद्यन्मरुत्वती प्रतिपद्भवति मरुत एवैतेन भागधेयेन निरवदायन्ते ।
आग्नेयपशुर्यज्ञो वा अग्निर्नेद्यज्ञादग्नेरयामेति ।
कवत्युत्तरस्याह्नः प्रतिपद्भवति कायोपालम्भ्या प्रजापतिर्वै कः प्रजापतिमेव तदन्ततः प्रीणन्ति ।
प्रजापतिर्वा षक्षत कं वै प्रजाभ्यो भूवं कमात्मनेऽसानीति ।
स एतां कवतीं प्रतिपदमपश्यत्कायामुपालम्भ्याम् ।
ततो वै स कं प्रजाभ्योऽभवत्कमात्मने ।
कं हैव प्रजाभ्यो भवति कमात्मने य एवं वेद ।
आग्नेयः पशुर्यज्ञो वा अग्निर्नेद्यज्ञादग्नेरयामेति २३१