सोऽकामयत वैश्वदेवीः प्रजास्सृजेयेति ।
स एतं वैश्वदेवं यज्ञमपश्यत् ।
तमाहरत् ।
तेनायजत ।
तेन वैश्वदेवीः प्रजा असृजत ।
स यः कामयेत वैश्वदेवीः प्रजास्सृजेयेति स एतेन यजेत ।
वैश्वदेवीरेव प्रजास्सृजते ।
स त्रिवृद्र थन्तरसामा भवति ।
ब्रह्म वै त्रिवृत् ।
ब्रह्म रथन्तरम् ।
ब्रह्मणा वा एनास्तदसृजत ।
ब्रह्मणैव प्रजास्सृजते य एवं वेद ।
तस्याग्नेयश्च बार्हस्पत्यश्च पशू भवतः ।
ब्रह्म वा अग्निः ।
ब्रह्म बृहस्पतिः ।
ब्रह्मणा वा एनास्तदभिपूर्वमसृजत ।
ब्रह्मणैवाभिपूर्वं प्रजास्सृजते य एवं वेद ।
तस्य मैत्रावरुण्यनूबन्ध्या भवति ।
मित्रो वै यज्ञस्य स्विष्टं गृह्णाति वरुणो दुरिष्टम् ।
तद्यन्मैत्रावरुण्यनूबन्ध्या भवति पुनरेवास्मै मित्रो ददाति ।
स्विष्टमस्मै वरुणः करोति ।
द्यावापृथिव्योपालम्भ्या भवति ।
द्यावापृथिवी वा आइक्षेतां यद्वा अयमिदं सृजत आवं वा अयमिदं प्रतिष्ठे पश्यन्सृजते हन्तास्मिन्भागधेयमिच्छावहा इति ।
तेऽस्मिन्भागधेयमैच्छेताम् ।
ताभ्यामेतां द्यावापृथिव्यामुपालम्भ्यामकल्पयत् ।
तद्यदेता द्यावापृथिव्योपालम्भ्या भवति द्यावापृथिवी एवैतेन भागधेयेन निरवदयन्ते ।
आग्नेयः पशुर्यज्ञो वा अग्निर्नेद्यज्ञादग्नेरयामेति २३०