स एतांश्चातुर्मास्यान्यज्ञानपश्यत् ।
तानाहरत् ।
तैरयजत ।
तैरिमाः प्रजा असृजत ।
या इमा स्तनवतीस्ताभ्योऽन्नाद्यं प्रायच्छत् ।
ता अस्यान्नवतीः प्रजा अभवन् ।
स यः कामयेत बहुः प्रजया पशुभिः प्रजायेयान्नवतीर्म इमाः प्रजा स्युरिति स एतैर्यजेत ।
बहुरेव प्रजया पशुभिः प्रजायतेऽन्नवतीरस्य प्रजा भवन्ति ।
तदेषाभ्यनूच्यते ।
तिस्रो ह प्रजा अत्यायमीयुर्
न्यन्या अर्कमभितो विविश्युः
बृहद्ध तस्थौ रजसो विमाने
पवमानो हरित आ विवेश
इति ।
तद्यदाह तिस्रो ह प्रजा अत्यायमीयुरिति या एव ताः प्रजा अत्यायमायंस्ता एव ताः ।
न्यन्या अर्कमभितो विविश्युरित्यग्निर्वा अर्कस्तमिमाः प्रजा अभितो विष्टाः ।
बृहद्ध तस्थौ रजसो विमाने पवमानो हरित आ विवेशेति ।
दिशो वै हरितः ।
ता अयं वायुः पवमान आविष्ट इति वाजसनेयः ।
अथैकादशाक्षी ।
तिस्रो ह प्रजा अत्यायमीयुरिति ।
या एव ताः प्रजा अत्यायमायंस्ता एताः ।
न्यन्या अर्कमभितो विविश्युरित्यन्नं वा अर्कस्तदिमाः प्रजा अभितो विष्टाः ।
बृहद्ध तस्थौ रजसो विमान इति ।
मनो वै बृहत् ।
तदिदं रजसो विमाने मध्य आत्मनो हृदयं तत् ।
पवमानो हरित आ विवेशेति ।
प्रजा वै हरितः ।
ता अयं प्राणः पवमान आविष्ट इति २२९