अथैता नदं व ओदतीनामित्युष्णिहाभाजनमार्भवे पवमाने क्रियन्ते ।
तास्सप्ताक्षरपदा भवन्ति ।
सप्त प्राणाः ।
प्राणैरेव तत्समृध्यमाना यन्ति ।
प्राणेषु प्रतितिष्ठन्ति ।
उत ह्यहिंस्यं ब्राह्मणं हिंसन्ति श्रोत्रियं वा गृहमेधिनं वा ।
तद्यत्सप्ताक्षरपदा भवन्ति प्राणैरेव तत्समृध्यन्ते ।
ताश्चतुष्पदा भवन्ति प्रतिष्ठायै ।
चतुष्पदीव प्रत्यष्ठादिति वा आहुः ।
सुप्रतिष्ठितं तास्वभीवर्तः ।
वाग्वा अभीवर्तः ।
वाचो वा एते व्यृध्यन्ते ये व्रात्यां धावयन्ति ।
तद्यदभीवर्तो भवति वाचैव तत्समृध्यन्ते ।
अग्न आ याह्यग्निभिरित्यग्निष्टोमसाम भवति ।
अग्नयो वै सर्वे देवाः ।
सर्वानेव तेन देवानपियन्ति ।
तत्त्रयस्त्रिंशं भवति ।
त्रयस्त्रिंशद्वै सर्वा देवताः ।
सर्वास्वेवैतद्देवतासु यज्ञस्यान्ततः प्रतितिष्ठन्ति २२५