सो वा आग्नेयी भवति ।
अग्निर्वै लोकानां प्रज्ञपयिता ।
स यो लोकानां प्रज्ञपयिता स नो लोकान्प्रज्ञपयादिति ।
न हि ते अग्ने तन्वै क्रूरं विवेद मर्त्य इति यदिह क्रूरमशान्तमचारिष्म तदेतयापहनामहा इति ।
कपिर्बिभस्ति तेजनं पुनर्जरायु गौरिवेति पुनरेवैतयापियन्ति ।
अग्ने विश्वेभिरग्निभिरिति वैश्वाग्नमाज्यं भवति ।
अग्नयो वै विश्वे देवाः ।
विश्वानेव तेन देवानपियन्ति ।
तदानुष्टुभं भवति सवनमुखे सवनमुखे वाचा समृध्यामहा इति ।
तत्त्रिवृद्भवति ब्रह्म वै त्रिवृत् ।
ब्रह्मणो वा एते व्यृध्यन्ते ये व्रात्यां धावयन्ति ।
राजपुत्रा इति ह्येनानाचक्षते ।
तद्यत्त्रिवृद्भवति ब्रह्मणैव तत्समृध्यन्ते ।
पञ्चदशं मैत्रावरुणस्य ।
क्षत्रं वै पञ्चदशः ।
अपभ्रंशो ह वै ब्रह्मणः क्षत्रम् ।
क्षत्रेणैव तत्समृध्यन्ते ।
सप्तदशं ब्राह्मणाच्छंसिनः ।
प्रजापतिर्वै सप्तदशः ।
प्रजापतिनैव तत्समृध्यन्ते ।
षोडशमच्छावाकस्य ।
इन्द्रि यं वै वीर्यं षोडशी ।
इन्द्रि येणैव तद्वीर्येण समृध्यन्ते २२३