अथाकामयतात्रिर्भूयिष्ठा म ऋषयः प्रजायामाजायेरन्निति स एतं त्रिणवं स्तोममपश्यत् ।
तमाहरत् ।
तेनायजत ।
तेजो वै त्रिणव स्तोमानाम् ।
ततो वै तस्य भूयिष्ठा ऋषयः प्रजायामाजायन्त परस्सहस्रा हास्य प्रजायां मन्त्रकृत आसुरपि हास्य स्त्रियो मन्त्रकृत आसुः ।
तस्माद्योऽप्यात्रेयीं स्त्रियं हन्ति तं पर्येव चक्षते ।
तेजस्वी भवति य एवं वेद ।
अथाकामयत विश्वामित्रो राज्यं मे प्रजा गच्छेदिति ।
स एतं त्रयस्त्रिंशं स्तोममपश्यत् ।
तमाहरत् ।
तेनायजत ।
क्षत्रं वै त्रयस्त्रिंश स्तोमानाम् ।
ततो वै तस्य राज्यं प्रजागच्छत् ।
अष्टको हास्य प्रजायामभिषिषिचे ।
गच्छति राज्यं य एवं वेद ।
ततो वै ते प्रजा अस्मिल्ँ लोके विधाय स्वर्गं लोकमगच्छन् ।
प्रजामेवास्मिल्ँ लोके विधाय स्वर्गं लोकं गच्छति य एवं वेद २१९