अथैते दिशां स्तोमाः ।
दिशो वा अकामयन्त समानेन यज्ञेन समानीमृद्धिमृध्नुयाम प्रतितिष्ठेमानन्तं स्वर्गं लोकं जयेमेति ।
ता एतान्यज्ञानपश्यन् ।
तानाहरन्त ।
तैरयजन्त ।
सेयं प्राची दिक्प्रथमायजत ।
सैतेनायजत ।
सैतामेवर्द्धिमार्ध्नोदेतां प्रतिष्ठामेतमनन्तं स्वर्गं लोकमजयत् ।
स एष एतस्यानन्त स्वर्गो लोको जितः ।
स यो ह वा अपि बहून्येवाहानि प्राङियान्नैवैतस्या अन्तं विन्देत् ।
अथेयमूर्ध्वा दिगैक्षत येनैवेमाः पूर्वा इष्ट्वारात्सुस्तेनो एवाहं यजा इति ।
सैतेनैवायजत ।
सैतामेवर्द्धिमार्ध्नोदेतां प्रतिष्ठामेतमनन्तं स्वर्गं लोकमजयत् ।
स एष एतस्यानन्त स्वर्गो लोको जितः ।
स यो ह वा अपि बहून्येवाहान्यूर्ध्व इयान्नैवैतस्या अन्तं विन्देत् २१४