अध क्षपा परिष्कृत इत्यनुष्टुबन्त्या भवति ।
स ह वा उद्गाता राजानं राजसूयेन याजयेद्य एनं बहिष्पवमान एव देवानां देवासन्दीमारोहयेत् ।
अनुष्टुप्प्रतिपद्भवति अनुष्टुबन्त्या ।
तयोश्चतुष्षष्टिरक्षराणि ।
ततो यानि षष्टिरासन्दी सा ।
अथ यानि चत्वार्यासन्दीपादास्ते ।
एतद्वै राजानमुद्गाता बहिष्पवमान एव देवानां देवासन्दीमारोहयति ।
उभयान्याज्यानि भवन्ति ।
उभे ह्यत्र सामनी क्रियेते ।
तदाहुरन्यतराण्येव कार्याणि यान्येव बार्हतानि ।
विड्भाजनानि वा आज्यान्यपि वाजिन्या विशः क्षत्रं सूयाता इति ।
तदु वा आहुरुभयान्येव कार्याणि ।
सर्वेषां वै राज्यायाभिषिच्यमानोऽभिषिच्यते ।
तस्मादुभयान्येव कार्याणीति ।
तानि पञ्चदशानि भवन्ति ।
क्षत्रं वै पञ्चदशः ।
क्षत्रेणाभिषिच्यमानोऽभिषिच्याता इति १९९