अथैते सरस्वतश्च सरस्वत्याश्च ।
एतद्वै दैव्यं मिथुनं प्रजननं यत्सरस्वांश्च सरस्वती च ।
दैव्येन मिथुनेन प्रजाया इति ।
तदाहुः पुंसः पूर्वा कार्या स्त्रिया उत्तरा ।
तथा सुष्वाणस्यानपगल्भ्यो राजपुत्र आजायत इति ।
तदु वा आहुर्वायुर्वै रेतोधाः ।
प्रजननं सरस्वती ।
तौ सरस्वन्तं मिथुनात्प्रजनयतः ।
अथो वाशिता वै पूर्वा धावत्यन्वमृषभः सरस्वत्या एव पूर्वा कार्येति ।
एतदु हैतत्सरस्वतस्त्वेव पूर्वा कार्या ।
अथ ब्राह्मणस्पत्या ब्रह्मण्य क्षत्रं सूयाता इति ।
अथ सावित्री सवितृप्रसूतस्सूयाता इति ।
अथैते उभे प्रतिपदौ भवतः ।
उभे ह्यत्र सामनी क्रियेते ।
अभिवन्नवर्चं भवत्यभिषिक्त्यै रूपम् ।
अथो तेनैव त्रिवृत स्तोमान्न यन्ति ।
सवत्षडृचं भवति ।
सामानं वदन्तीभिस्सूयाता इति ।
वृषण्वद्भवति ।
अयं वृषाभिषिच्यमानोऽभिषिच्याता इति ।
चतुरृचं भवति चतुष्पदां पशूनामवरुद्ध्यै ।
परोक्षं द्विपदा भवन्ति द्विपदां पशूनामवरुद्ध्यै ।
पर्यासो भवति यः पर्यासे कामस्स म उपाप्तोऽसदिति १९८