अथैष वाजपेयः ।
वाजपेयेनान्नाद्यकामो यजेत ।
अन्नपेयो ह वा एष यद्वाजपेयः ।
अन्नं वै वाजः ।
यदा वै गौरश्वः पुरुषोऽन्नस्य सुहितो भवत्यथ स वाजी भवति ।
अग्निष्टोमेन ब्रह्मवर्चसकामो यजेत ब्रह्म वा अग्निष्टोमो ब्रह्मवर्चसस्यैवावरुद्ध्यै ।
ऋतूनां च ह खलु वै पशूनां च कामायाभिशिच्यमानोऽभिशिच्यते ।
तस्य पञ्च स्तोत्राणि चतुस्त्रिंशानि कुर्युस्सर्वान्पवमानानुभे ब्रह्मसामनी ।
तावतीरुक्थ्यस्य स्तोत्र्याः ।
आप्नुवन्ति तं कामं य उक्थ्ये ।
नो वा अग्निष्टोमाद्यन्ति ।
न ह खलु वा एषोऽग्निष्टोमो नोक्थ्यो न षोडशिमान्नातिरात्रः ।
अतिरिक्तयज्ञो ह वा एषः ।
अतिरिक्तो वै प्रजापतिः ।
प्राजापत्य एष यज्ञः ।
प्रजापतेरेवाप्त्यै ।
तस्य बृहच्छिपिविष्टवती भवति ।
पशवो वै शिपिविष्टाः ।
क्षत्रं बृहत् ।
क्षत्रियस्यो अयं लोकः ।
अस्य नो लोकवतस्साम्नः पशवो लोकमनूपतिष्ठान्ता इति ।
त्रिष्टुप्सु स्तुवन्ति बृहत्साम ।
क्षत्रं वै त्रिष्टुप् ।
क्षत्रेणाभिशिच्यमानोऽभिषिच्याता इति ।
वैष्णवीषु स्तुवन्ति विष्णुर्वै परमो देवतानां परमया देवतयाभिषिच्यमानोऽभिष्च्याता इति ।
आजिं धावन्ति प्रजापतेरेवाप्त्यै स्वर्गस्य च लोकस्योज्जित्यै ।
सप्तदश प्रव्याधान्धावन्ति ।
सप्तदशो वै प्रजापतिः ।
प्राजापत्य एष यज्ञः प्रजापतेरेवाप्त्यै १९२