अथैष पञ्चशारदीयः ।
मरुतो वा अकामयन्तौजिष्ठा बलिष्ठा भूयिष्ठा वीर्यवत्तमा देवानां स्याम जयेम स्वर्गं लोकमिति ।
त एतं यज्ञमपश्यन् ।
तमाहरन् ।
तेनायजन्त ।
ततो वै त ओजिष्ठा बलिष्ठा भूयिष्ठा वीर्यवत्तमा देवानामासन्नजयन्स्वर्गं लोकम् ।
ओजिष्ठो बलिष्ठो भूयिष्ठो वीर्यवत्तम स्वानां भवति जयति स्वर्गं लोकं य एवं वेद ।
स वा एष विशामेव यज्ञः ।
विशो वै मरुतस्तस्माद्विशां यज्ञः ।
तेन हैतेनैक्यावा कान्दम ईजे ।
स हौजिष्ठश्चैव बलिष्ठश्च भूयिष्ठश्च वीर्यवत्तमश्च स्वानामास जिगाय वा लोकं न वा ।
स सप्तदशो भवति प्रजापतिर्वै सप्तदशः ।
प्रजापतिः प्रजननं स यः प्रजननं स मा प्रजनयादिति ।
तस्य रथन्तरं पृष्ठं भवति प्रजननं वै रथन्तरं तद्यत्प्रजननं तन्मा प्रजनयादिति ।
स उक्थ्यो भवति प्रजा वै पशव उक्थानि प्रजया पशुभिः प्रजाया इति १७५