प्रजापतिः प्रजा असृजत ।
ता अप्राणा असृजत ।
ताभ्य एतेनैव साम्ना प्राणमदधात् ।
प्राणो वै गायत्रम् ।
सर्वमायुरेति य एवं वेद ।
ताः प्राणं विविदाना रक्षांस्यन्वसचन्त ।
ता एतदेव साम गायन्नत्रायत ।
यद्गायन्नत्रायत तद्गयत्रस्य गायत्रत्वम् ।
त्रायत एनं सर्वस्मात्पाप्मनो य एवं वेद ।
तदूर्ध्वमिव गेयम् ।
ऊर्ध्वो वै स्वर्गो लोकः ।
स्वर्गस्यैव लोकस्य समष्ट्यै ।
त्र्यावृद्गेयम् ।
त्रयो वा इमे लोकाः ।
एषां लोकानामाप्त्यै ।
त्र्युदासं गेयम् ।
त्रयो वै प्राणापानव्यानाः ।
तेषां सन्तत्यै ।
समस्मै प्राणापानव्यानास्तायन्ते य एवं वेद ।
त्र्यावृद्गेयम् ।
त्रयो वा इमे लोकाः ।
एषां लोकानां सन्तत्यै ।
समस्मा इमे लोकास्तायन्ते य एवं वेद १११