दे॒वानां॒ नु व॒यं जाना॒ प्र वो॑चाम विप॒न्यया॑।उ॒क्थेषु॑ श॒स्यमा॑नेषु॒ यः पश्या॒दुत्त॑रे यु॒गे॥ १०.०७२.०१
ब्रह्म॑ण॒स्पति॑रे॒ता सं क॒र्मार॑ इवाधमत्।दे॒वानां॑ पू॒र्व्ये यु॒गेऽस॑त॒ सद॑जायत॥ १०.०७२.०२
दे॒वानां॑ यु॒गे प्र॑थ॒मेऽस॑त॒ सद॑जायत।तदाशा॒ अन्व॑जायन्त॒ तदु॑त्ता॒नप॑द॒स्परि॑॥ १०.०७२.०३
भूर्ज॑ज्ञ उत्ता॒नप॑दो भु॒व आशा॑ अजायन्त।अदि॑ते॒र्दक्षो॑ अजायत॒ दक्षा॒द्वदि॑ति॒ परि॑॥ १०.०७२.०४
अदि॑ति॒र्ह्यज॑निष्ट॒ दक्ष॒ या दु॑हि॒ता तव॑।तां दे॒वा अन्व॑जायन्त भ॒द्रा अ॒मृत॑बन्धवः॥ १०.०७२.०५
यद्दे॑वा अ॒दः स॑लि॒ले सुसं॑रब्धा॒ अति॑ष्ठत।अत्रा॑ वो॒ नृत्य॑तामिव ती॒व्रो रे॒णुरपा॑यत॥ १०.०७२.०६
यद्दे॑वा॒ यत॑यो यथा॒ भुव॑ना॒न्यपि॑न्वत।अत्रा॑ समु॒द्र आ गू॒ळ्हमा सूर्य॑मजभर्तन॥ १०.०७२.०७
अ॒ष्टौ पु॒त्रासो॒ अदि॑ते॒र्ये जा॒तास्त॒न्वस्परि॑। दे॒वाँ उप॒ प्रैत्स॒प्तभि॒ परा॑ मार्ता॒ण्डमा॑स्यत्॥ १०.०७२.०८
स॒प्तभि॑ पु॒त्रैरदि॑ति॒रुप॒ प्रैत्पू॒र्व्यं यु॒गम्। प्र॒जायै॑ मृ॒त्यवे॑ त्व॒त्पुन॑र्मार्ता॒ण्डमाभ॑रत्॥ १०.०७२.०९