समि॑द्धो वि॒श्वत॒स्पति॒ पव॑मानो॒ वि रा॑जति।प्री॒णन्वृषा॒ कनि॑क्रदत्॥ ९.००५.०१

तनू॒नपा॒त्पव॑मान॒ शृङ्गे॒ शिशा॑नो अर्षति।अ॒न्तरि॑क्षेण॒ रार॑जत्॥ ९.००५.०२

ई॒ळेन्य॒ पव॑मानो र॒यिर्वि रा॑जति द्यु॒मान्।मधो॒र्धारा॑भि॒रोज॑सा॥ ९.००५.०३

ब॒र्हिः प्रा॒चीन॒मोज॑सा॒ पव॑मानः स्तृ॒णन्हरि॑।दे॒वेषु॑ दे॒व ई॑यते॥ ९.००५.०४

उदातै॑र्जिहते बृ॒हद्द्वारो॑ दे॒वीर्हि॑र॒ण्ययी॑।पव॑मानेन॒ सुष्टु॑ताः॥ ९.००५.०५

सु॒शि॒ल्पे बृ॑ह॒ती म॒ही पव॑मानो वृषण्यति।नक्तो॒षासा॒ न द॑र्श॒ते॥ ९.००५.०६

उ॒भा दे॒वा नृ॒चक्ष॑सा॒ होता॑रा॒ दैव्या॑ हुवे।पव॑मान॒ इन्द्रो॒ वृषा॑॥ ९.००५.०७

भार॑ती॒ पव॑मानस्य॒ सर॑स्व॒तीळा॑ म॒ही।इ॒मं नो॑ य॒ज्ञमा ग॑मन्ति॒स्रो दे॒वीः सु॒पेश॑सः॥ ९.००५.०८

त्वष्टा॑रमग्र॒जां गो॒पां पु॑रो॒यावा॑न॒मा हु॑वे।इन्दु॒रिन्द्रो॒ वृषा॒ हरि॒ पव॑मानः प्र॒जाप॑तिः॥ ९.००५.०९

वन॒स्पतिं॑ पवमान॒ मध्वा॒ सम॑ङ्ग्घि॒ धार॑या।स॒हस्र॑वल्शं॒ हरि॑तं॒ भ्राज॑मानं हिर॒ण्यय॑म्॥ ९.००५.१०

विश्वे॑ देवा॒ स्वाहा॑कृतिं॒ पव॑मान॒स्या ग॑त।वा॒युर्बृह॒स्पति॒ सूर्यो॒ऽग्निरिन्द्र॑ स॒जोष॑सः॥ ९.००५.११