स प॑वस्व॒ मदा॑य॒ कं नृ॒चक्षा॑ दे॒ववी॑तये।इन्द॒विन्द्रा॑य पी॒तये॑॥ ९.०४५.०१
स नो॑ अर्षा॒भि दू॒त्यं त्वमिन्द्रा॑य तोशसे।दे॒वान्सखि॑भ्य॒ आ वर॑म्॥ ९.०४५.०२
उ॒त त्वाम॑रु॒णं व॒यं गोभि॑रञ्ज्मो॒ मदा॑य॒ कम्।वि नो॑ रा॒ये दुरो॑ वृधि॥ ९.०४५.०३
अत्यू॑ प॒वित्र॑मक्रमीद्वा॒जी धुरं॒ न याम॑नि।इन्दु॑र्दे॒वेषु॑ पत्यते॥ ९.०४५.०४
समी॒ सखा॑यो अस्वर॒न्वने॒ क्रीळ॑न्त॒मत्य॑विम्।इन्दुं॑ ना॒वा अ॑नूषत॥ ९.०४५.०५
तया॑ पवस्व॒ धार॑या॒ यया॑ पी॒तो वि॒चक्ष॑से।इन्दो॑ स्तो॒त्रे सु॒वीर्य॑म्॥ ९.०४५.०६