ए॒ष उ॒ स्य वृषा॒ रथोऽव्यो॒ वारे॑भिरर्षति।गच्छ॒न्वाजं॑ सह॒स्रिण॑म्॥ ९.०३८.०१

ए॒तं त्रि॒तस्य॒ योष॑णो॒ हरिं॑ हिन्व॒न्त्यद्रि॑भिः।इन्दु॒मिन्द्रा॑य पी॒तये॑॥ ९.०३८.०२

ए॒तं त्यं ह॒रितो॒ दश॑ मर्मृ॒ज्यन्ते॑ अप॒स्युव॑।याभि॒र्मदा॑य॒ शुम्भ॑ते॥ ९.०३८.०३

ए॒ष स्य मानु॑षी॒ष्वा श्ये॒नो न वि॒क्षु सी॑दति।गच्छ॑ञ्जा॒रो न यो॒षित॑म्॥ ९.०३८.०४

ए॒ष स्य मद्यो॒ रसोऽव॑ चष्टे दि॒वः शिशु॑।य इन्दु॒र्वार॒मावि॑शत्॥ ९.०३८.०५

ए॒ष स्य पी॒तये॑ सु॒तो हरि॑रर्षति धर्ण॒सिः।क्रन्द॒न्योनि॑म॒भि प्रि॒यम्॥ ९.०३८.०६