प्र सोमा॑सो अधन्विषु॒ पव॑मानास॒ इन्द॑वः।श्री॒णा॒ना अ॒प्सु मृ॑ञ्जत॥ ९.०२४.०१

अ॒भि गावो॑ अधन्विषु॒रापो॒ न प्र॒वता॑ य॒तीः।पु॒ना॒ना इन्द्र॑माशत॥ ९.०२४.०२

प्र प॑वमान धन्वसि॒ सोमेन्द्रा॑य॒ पात॑वे।नृभि॑र्य॒तो वि नी॑यसे॥ ९.०२४.०३

त्वं सो॑म नृ॒माद॑न॒ पव॑स्व चर्षणी॒सहे॑।सस्नि॒र्यो अ॑नु॒माद्य॑॥ ९.०२४.०४

इन्दो॒ यदद्रि॑भिः सु॒तः प॒वित्रं॑ परि॒धाव॑सि।अर॒मिन्द्र॑स्य॒ धाम्ने॑॥ ९.०२४.०५

पव॑स्व वृत्रहन्तमो॒क्थेभि॑रनु॒माद्य॑।शुचि॑ पाव॒को अद्भु॑तः॥ ९.०२४.०६

शुचि॑ पाव॒क उ॑च्यते॒ सोम॑ सु॒तस्य॒ मध्व॑।दे॒वा॒वीर॑घशंस॒हा॥ ९.०२४.०७