उपा॑स्मै गायता नर॒ पव॑माना॒येन्द॑वे।अ॒भि दे॒वाँ इय॑क्षते॥ ९.०११.०१

अ॒भि ते॒ मधु॑ना॒ पयोऽथ॑र्वाणो अशिश्रयुः।दे॒वं दे॒वाय॑ देव॒यु॥ ९.०११.०२

स न॑ पवस्व॒ शं गवे॒ शं जना॑य॒ शमर्व॑ते।शं रा॑ज॒न्नोष॑धीभ्यः॥ ९.०११.०३

ब॒भ्रवे॒ नु स्वत॑वसेऽरु॒णाय॑ दिवि॒स्पृशे॑।सोमा॑य गा॒थम॑र्चत॥ ९.०११.०४

हस्त॑च्युतेभि॒रद्रि॑भिः सु॒तं सोमं॑ पुनीतन।मधा॒वा धा॑वता॒ मधु॑॥ ९.०११.०५

नम॒सेदुप॑ सीदत द॒ध्नेद॒भि श्री॑णीतन।इन्दु॒मिन्द्रे॑ दधातन॥ ९.०११.०६

अ॒मि॒त्र॒हा विच॑र्षणि॒ पव॑स्व सोम॒ शं गवे॑।दे॒वेभ्यो॑ अनुकाम॒कृत्॥ ९.०११.०७

इन्द्रा॑य सोम॒ पात॑वे॒ मदा॑य॒ परि॑ षिच्यसे।म॒न॒श्चिन्मन॑स॒स्पति॑॥ ९.०११.०८

पव॑मान सु॒वीर्यं॑ र॒यिं सो॑म रिरीहि नः।इन्द॒विन्द्रे॑ण नो यु॒जा॥ ९.०११.०९