आ तू न॑ इन्द्र क्षु॒मन्तं॑ चि॒त्रं ग्रा॒भं सं गृ॑भाय।म॒हा॒ह॒स्ती दक्षि॑णेन॥ ८.०८१.०१

वि॒द्मा हि त्वा॑ तुविकू॒र्मिं तु॒विदे॑ष्णं तु॒वीम॑घम्।तु॒वि॒मा॒त्रमवो॑भिः॥ ८.०८१.०२

न॒हि त्वा॑ शूर दे॒वा न मर्ता॑सो॒ दित्स॑न्तम्।भी॒मं न गां वा॒रय॑न्ते॥ ८.०८१.०३

एतो॒ न्विन्द्रं॒ स्तवा॒मेशा॑नं॒ वस्व॑ स्व॒राज॑म्।न राध॑सा मर्धिषन्नः॥ ८.०८१.०४

प्र स्तो॑ष॒दुप॑ गासिष॒च्छ्रव॒त्साम॑ गी॒यमा॑नम्।अ॒भि राध॑सा जुगुरत्॥ ८.०८१.०५

आ नो॑ भर॒ दक्षि॑णेना॒भि स॒व्येन॒ प्र मृ॑श।इन्द्र॒ मा नो॒ वसो॒र्निर्भा॑क्॥ ८.०८१.०६

उप॑ क्रम॒स्वा भ॑र धृष॒ता धृ॑ष्णो॒ जना॑नाम्।अदा॑शूष्टरस्य॒ वेद॑॥ ८.०८१.०७

इन्द्र॒ य उ॒ नु ते॒ अस्ति॒ वाजो॒ विप्रे॑भि॒ सनि॑त्वः।अ॒स्माभि॒ सु तं स॑नुहि॥ ८.०८१.०८

स॒द्यो॒जुव॑स्ते॒ वाजा॑ अ॒स्मभ्यं॑ वि॒श्वश्च॑न्द्राः।वशै॑श्च म॒क्षू ज॑रन्ते॥ ८.०८१.०९