त्यान्नु क्ष॒त्रियाँ॒ अव॑ आदि॒त्यान्या॑चिषामहे।सु॒मृ॒ळी॒काँ अ॒भिष्ट॑ये॥ ८.०६७.०१

मि॒त्रो नो॒ अत्यं॑ह॒तिं वरु॑णः पर्षदर्य॒मा।आ॒दि॒त्यासो॒ यथा॑ वि॒दुः॥ ८.०६७.०२

तेषां॒ हि चि॒त्रमु॒क्थ्यं वरू॑थ॒मस्ति॑ दा॒शुषे॑।आ॒दि॒त्याना॑मरं॒कृते॑॥ ८.०६७.०३

महि॑ वो मह॒तामवो॒ वरु॑ण॒ मित्रार्य॑मन्।अवां॒स्या वृ॑णीमहे॥ ८.०६७.०४

जी॒वान्नो॑ अ॒भि धे॑त॒नादि॑त्यासः पु॒रा हथा॑त्।कद्ध॑ स्थ हवनश्रुतः॥ ८.०६७.०५

यद्व॑ श्रा॒न्ताय॑ सुन्व॒ते वरू॑थ॒मस्ति॒ यच्छ॒र्दिः।तेना॑ नो॒ अधि॑ वोचत॥ ८.०६७.०६

अस्ति॑ देवा अं॒होरु॒र्वस्ति॒ रत्न॒मना॑गसः।आदि॑त्या॒ अद्भु॑तैनसः॥ ८.०६७.०७

मा न॒ सेतु॑ सिषेद॒यं म॒हे वृ॑णक्तु न॒स्परि॑।इन्द्र॒ इद्धि श्रु॒तो व॒शी॥ ८.०६७.०८

मा नो॑ मृ॒चा रि॑पू॒णां वृ॑जि॒नाना॑मविष्यवः।देवा॑ अ॒भि प्र मृ॑क्षत॥ ८.०६७.०९

उ॒त त्वाम॑दिते मह्य॒हं दे॒व्युप॑ ब्रुवे।सु॒मृ॒ळी॒काम॒भिष्ट॑ये॥ ८.०६७.१०

पर्षि॑ दी॒ने ग॑भी॒र आँ उग्र॑पुत्रे॒ जिघां॑सतः।माकि॑स्तो॒कस्य॑ नो रिषत्॥ ८.०६७.११

अ॒ने॒हो न॑ उरुव्रज॒ उरू॑चि॒ वि प्रस॑र्तवे।कृ॒धि तो॒काय॑ जी॒वसे॑॥ ८.०६७.१२

ये मू॒र्धान॑ क्षिती॒नामद॑ब्धास॒ स्वय॑शसः।व्र॒ता रक्ष॑न्ते अ॒द्रुह॑॥ ८.०६७.१३

ते न॑ आ॒स्नो वृका॑णा॒मादि॑त्यासो मु॒मोच॑त।स्ते॒नं ब॒द्धमि॑वादिते॥ ८.०६७.१४

अपो॒ षु ण॑ इ॒यं शरु॒रादि॑त्या॒ अप॑ दुर्म॒तिः।अ॒स्मदे॒त्वज॑घ्नुषी॥ ८.०६७.१५

शश्व॒द्धि व॑ सुदानव॒ आदि॑त्या ऊ॒तिभि॑र्व॒यम्।पु॒रा नू॒नं बु॑भु॒ज्महे॑॥ ८.०६७.१६

शश्व॑न्तं॒ हि प्र॑चेतसः प्रति॒यन्तं॑ चि॒देन॑सः।देवा॑ कृणु॒थ जी॒वसे॑॥ ८.०६७.१७

तत्सु नो॒ नव्यं॒ सन्य॑स॒ आदि॑त्या॒ यन्मुमो॑चति।ब॒न्धाद्ब॒द्धमि॑वादिते॥ ८.०६७.१८

नास्माक॑मस्ति॒ तत्तर॒ आदि॑त्यासो अति॒ष्कदे॑।यू॒यम॒स्मभ्यं॑ मृळत॥ ८.०६७.१९

मा नो॑ हे॒तिर्वि॒वस्व॑त॒ आदि॑त्याः कृ॒त्रिमा॒ शरु॑।पु॒रा नु ज॒रसो॑ वधीत्॥ ८.०६७.२०

वि षु द्वेषो॒ व्यं॑ह॒तिमादि॑त्यासो॒ वि संहि॑तम्।विष्व॒ग्वि वृ॑हता॒ रप॑॥ ८.०६७.२१