अश्वि॑ना॒वेह ग॑च्छतं॒ नास॑त्या॒ मा वि वे॑नतम्।हं॒सावि॑व पतत॒मा सु॒ताँ उप॑॥ ५.०७८.०१

अश्वि॑ना हरि॒णावि॑व गौ॒रावि॒वानु॒ यव॑सम्। हं॒सावि॑व पतत॒मा सु॒ताँ उप॑॥ ५.०७८.०२

अश्वि॑ना वाजिनीवसू जु॒षेथां॑ य॒ज्ञमि॒ष्टये॑।हं॒सावि॑व पतत॒मा सु॒ताँ उप॑॥ ५.०७८.०३

अत्रि॒र्यद्वा॑मव॒रोह॑न्नृ॒बीस॒मजो॑हवी॒न्नाध॑मानेव॒ योषा॑। श्ये॒नस्य॑ चि॒ज्जव॑सा॒ नूत॑ने॒नाग॑च्छतमश्विना॒ शंत॑मेन॥ ५.०७८.०४

वि जि॑हीष्व वनस्पते॒ योनि॒ सूष्य॑न्त्या इव।श्रु॒तं मे॑ अश्विना॒ हवं॑ स॒प्तव॑ध्रिं च मुञ्चतम्॥ ५.०७८.०५

भी॒ताय॒ नाध॑मानाय॒ ऋष॑ये स॒प्तव॑ध्रये।मा॒याभि॑रश्विना यु॒वं वृ॒क्षं सं च॒ वि चा॑चथः॥ ५.०७८.०६

यथा॒ वात॑ पुष्क॒रिणीं॑ समि॒ङ्गय॑ति स॒र्वत॑।ए॒वा ते॒ गर्भ॑ एजतु नि॒रैतु॒ दश॑मास्यः॥ ५.०७८.०७

यथा॒ वातो॒ यथा॒ वनं॒ यथा॑ समु॒द्र एज॑ति।ए॒वा त्वं द॑शमास्य स॒हावे॑हि ज॒रायु॑णा॥ ५.०७८.०८

दश॒ मासा॑ञ्छशया॒नः कु॑मा॒रो अधि॑ मा॒तरि॑।नि॒रैतु॑ जी॒वो अक्ष॑तो जी॒वो जीव॑न्त्या॒ अधि॑॥ ५.०७८.०९