अग्ने॑ पावक रो॒चिषा॑ म॒न्द्रया॑ देव जि॒ह्वया॑।आ दे॒वान्व॑क्षि॒ यक्षि॑ च॥ ५.०२६.०१
तं त्वा॑ घृतस्नवीमहे॒ चित्र॑भानो स्व॒र्दृश॑म्।दे॒वाँ आ वी॒तये॑ वह॥ ५.०२६.०२
वी॒तिहो॑त्रं त्वा कवे द्यु॒मन्तं॒ समि॑धीमहि।अग्ने॑ बृ॒हन्त॑मध्व॒रे॥ ५.०२६.०३
अग्ने॒ विश्वे॑भि॒रा ग॑हि दे॒वेभि॑र्ह॒व्यदा॑तये।होता॑रं त्वा वृणीमहे॥ ५.०२६.०४
यज॑मानाय सुन्व॒त आग्ने॑ सु॒वीर्यं॑ वह।दे॒वैरा स॑त्सि ब॒र्हिषि॑॥ ५.०२६.०५
स॒मि॒धा॒नः स॑हस्रजि॒दग्ने॒ धर्मा॑णि पुष्यसि।दे॒वानां॑ दू॒त उ॒क्थ्य॑॥ ५.०२६.०६
२
न्यग्निं जा॒तवे॑दसं होत्र॒वाहं॒ यवि॑ष्ठ्यम्।दधा॑ता दे॒वमृ॒त्विज॑म्॥ ५.०२६.०७
प्र य॒ज्ञ ए॑त्वानु॒षग॒द्या दे॒वव्य॑चस्तमः।स्तृ॒णी॒त ब॒र्हिरा॒सदे॑॥ ५.०२६.०८
एदं म॒रुतो॑ अ॒श्विना॑ मि॒त्रः सी॑दन्तु॒ वरु॑णः।दे॒वास॒ सर्व॑या वि॒शा॥ ५.०२६.०९