वार्त्र॑हत्याय॒ शव॑से पृतना॒षाह्या॑य च।इन्द्र॒ त्वा व॑र्तयामसि॥ ३.०३७.०१

अ॒र्वा॒चीनं॒ सु ते॒ मन॑ उ॒त चक्षु॑ शतक्रतो।इन्द्र॑ कृ॒ण्वन्तु॑ वा॒घत॑॥ ३.०३७.०२

नामा॑नि ते शतक्रतो॒ विश्वा॑भिर्गी॒र्भिरी॑महे।इन्द्रा॑भिमाति॒षाह्ये॑॥ ३.०३७.०३

पु॒रु॒ष्टु॒तस्य॒ धाम॑भिः श॒तेन॑ महयामसि।इन्द्र॑स्य चर्षणी॒धृत॑॥ ३.०३७.०४

इन्द्रं॑ वृ॒त्राय॒ हन्त॑वे पुरुहू॒तमुप॑ ब्रुवे।भरे॑षु॒ वाज॑सातये॥ ३.०३७.०५

वाजे॑षु सास॒हिर्भ॑व॒ त्वामी॑महे शतक्रतो।इन्द्र॑ वृ॒त्राय॒ हन्त॑वे॥ ३.०३७.०६

द्यु॒म्नेषु॑ पृत॒नाज्ये॑ पृत्सु॒तूर्षु॒ श्रव॑स्सु च।इन्द्र॒ साक्ष्वा॒भिमा॑तिषु॥ ३.०३७.०७

शु॒ष्मिन्त॑मं न ऊ॒तये॑ द्यु॒म्निनं॑ पाहि॒ जागृ॑विम्।इन्द्र॒ सोमं॑ शतक्रतो॥ ३.०३७.०८

इ॒न्द्रि॒याणि॑ शतक्रतो॒ या ते॒ जने॑षु प॒ञ्चसु॑।इन्द्र॒ तानि॑ त॒ आ वृ॑णे॥ ३.०३७.०९

अग॑न्निन्द्र॒ श्रवो॑ बृ॒हद्द्यु॒म्नं द॑धिष्व दु॒ष्टर॑म्।उत्ते॒ शुष्मं॑ तिरामसि॥ ३.०३७.१०

अ॒र्वा॒वतो॑ न॒ आ ग॒ह्यथो॑ शक्र परा॒वत॑। उ॒ लो॒को यस्ते॑ अद्रिव॒ इन्द्रे॒ह तत॒ आ ग॑हि॥ ३.०३७.११