०५६

विराड् असि विराजं मा कृणु
तस्यास् ते यशो भक्षीय ॥

स्वराड् असि स्वराजं मा कृणु
तस्यास् ते मधु भक्षीय ॥

सम्राड् असि सम्राजं मा कृणु
तस्यास् ते अन्नं भक्षीय ॥

वीर्यावता ते हविषा जुहोमि
जीवातवे न मर्तवे ।
दक्षं ते भद्रम् आहार्षं
परा सुवाम्य् आमयत् ॥

अभिवीरेण ते (…) ॥ (see 4abcd)

सुवीरेण ते (…) ॥ (see 4abcd)

सर्ववीरेण ते हविषा जुहोमि
जीवातवे न मर्तवे ।
दक्षं ते भद्रम् आहार्षं
परा सुवाम्य् आमयत् ॥

प्रजावता ते हविषा जुहोमि
गर्भम् आ धत्स्व योन्याम् । (Bhatt. garmam)
स काले जायतां पुनर्
दशमे मासि सूतवे ॥

सुप्रजसा ते (…) ॥ (see 8abcd)

सुपुत्रेण ते हविषा जुहोमि
गर्भम् आ धत्स्व योन्याम् ।
स काले जायतां पुनर्
दशमे मासि सूतवे ॥

भूतये ते हविषा जुहोमि-
-इमं देवासो अभि हिङ् कराथ ।
अस्मिन्न् एव पशवः सं विशन्तु
चतुष्पाद उत वा ये द्विपादः ॥

वित्तये ते (…) ॥ (see 11abcd)

स्वृद्धेन ते (…) ॥ (see 11abcd)

समृद्धेन ते हविषा जुहोमि-
-इमं देवासो अभि हिङ् कराथ ।
अस्मिन्न् एव पशवः सं विशन्तु
चतुष्पाद उत वा ये द्विपादः ॥

क्षेम्येण ते हविषा जुहोमि
क्षेम्यो भवासि पशुभिश् च वीरैः ।
इन्द्राग्नी त्वा सयुजा सखायौ
विश्वेभिर् देवैर् अनु सं ददेताम् ॥

प्रतिष्ठितेन ते हविषा जुहोमि
प्रति तिष्ठासि पशुभिः (…) ॥ (see 15bcd)

सम्भूतेन ते हविषा जुहोमि
सं भवासि पशुभिः (…) ॥ (see 15bcd)

प्रभूतेन ते हविषा जुहोमि
प्र भवासि पशुभिश् च वीरैः ।
इन्द्राग्नी त्वा सयुजा सखायौ
विश्वेभिर् देवैर् अनु सं ददेताम् ॥